曾執導《福爾摩斯》系列嘅英國名導Guy Ritchie又有新搞作，今次搵嚟Jake Gyllenhaal同Henry Cavill兩大型男擔正做雙主角，化身成遊走於灰色地帶嘅頂級特工。

電影講述Jake Gyllenhaal同Henry Cavill分別飾演遊走於灰色地帶嘅頂級特工Bronco同Sid，受Eiza González飾演嘅聯絡人Sophia所託，接下一單堪稱「自殺式」嘅危險任務。佢哋嘅目標係從一位冷血獨裁者手中，成功奪回被盜走嘅十億美元巨款。不過正所謂計劃趕不上變化，原本看似只係係一場不可能嘅劫案，但後來情況徹底失控，演變成一場鬥智鬥力嘅全面生存戰。

從預告可見電影充滿住Guy Ritchie標誌性嘅黑色幽默，爆破、飛車、用火箭筒打直升機等大場面亦應有盡有，Jake Gyllenhaal同Henry Cavill兩人討論戰術仍不忘互相鬥嘴。順帶一提，今次亦係Henry Cavill繼《The Man From U.N.C.L.E.（特務型戰）》同《The Ministry of Ungentlemanly Warfare（無限制軍團）》之後，第三度同Guy Ritchie合作。

除咗三位主角，電影其餘卡士包括《Gone Girl》Rosamund Pike、《Game of Thrones》Kristofer Hivju以及Fisher Stevens等實力派演員參演。《In The Grey》預定將於今年5月15日在美國正式上映，香港方面暫時未有確實檔期。