由Capcom製作嘅《生化危機9 安魂曲》推出後叫好又叫座，上市唔夠一星期已創下500萬套銷量佳績！為答謝一眾機迷支持，遊戲總監中西晃史今日拍片宣布，團隊目前正著手開發「故事擴充DLC」，並預告將於5月追加拍照模式及一款迷你遊戲。

A message from Koshi Nakanishi, director of Resident Evil Requiem. pic.twitter.com/54aKw80h8K

— Resident Evil (@RE_Games) March 10, 2026

中西晃史喺片中首先感謝全球玩家嘅熱烈支持，並透露團隊除咗會持續推出修復更新同改善效能之外，亦正為玩家準備一系列新內容。當中包括大家期待已久嘅「拍照模式」，另外預計今年5月左右仲會加入一款迷你遊戲。雖然佢未有透露迷你遊戲嘅具體玩法，但參考返之前《生化危機8》同《生化危機4 重製版》，好大機會係深受Fans歡迎嘅「傭兵模式（The Mercenaries）」。

至於影片嘅重頭戲，就係中西晃史親口證實《生化危機9 安魂曲》正在開發故事擴充DLC！佢喺片中舉起一張寫住「故事擴充內容開發中」嘅A4紙表示：「我哋計劃製作額外嘅故事內容，帶領玩家更深入探索《安魂曲》嘅世界。團隊正全力以赴製作中，不過需要啲時間，希望大家耐心等待及期待。」其實回顧返Capcom近年嘅操作，由《生化危機7》、《生化危機8》到《生化危機4 重製版》，集集都有推出故事擴充DLC補完劇情，所以今次宣布出DLC都算係意料之內，大家又會想聚焦邊個角色嘅故事呢？

有趣嘅係，喺正式公布故事擴充DLC之前，中西晃史仲展示咗幾張「惡搞」宣傳圖同玩家開玩笑。當中包括將Leon S. Kennedy同Grace嘅頭換成貓咪嘅惡搞封面、大反派Victor Gideon坐喺度打Poker嘅畫面，以及一款名為《Forbidden Requiem（禁忌安魂曲）》嘅假想遊戲海報，場面相當搞笑。