憑住《Fifty Shades of Grey》系列走紅嘅荷里活性感女星Dakota Johnson，最近首度為著名品牌Calvin Klein拍攝2026年春季系列廣告。佢以火辣造型演繹品牌最新內衣同牛仔褲系列，更半裸上陣大騷完美身段。大家覺得呢輯相吸唔吸睛？

呢輯廣告大片由著名攝影師Gordon von Steiner親自操刀，以「Less is More」哲學為主軸，重新演繹品牌一貫嘅自信同性感風格。從官方公開嘅相片及影片可見，廣告聚焦在Dakota Johnson喺屋企度過慵懶嘅一日，畫面遊走於性感同幽默俏皮之間。佢著上品牌最新嘅Ultralight超輕薄內衣同90年代復古剪裁牛仔褲，一時喺張床度跳舞，一時又攤喺梳化上擺甫士，甚至仲有半裸上身打桌波嘅惹火畫面，完美展現出嗰種隨性又自信嘅性感魅力。

對於今次合作，Dakota Johnson亦分享咗自己嘅感受：「Calvin Klein嘅牛仔褲同內衣有一種超越時間嘅經典特質，一著上身就覺得好啱feel。當一個女人自己喺屋企做嘢、睇書或者做任何事嗰陣，嗰種感覺其實好自由、好有女人味。將呢種狀態同Calvin Klein嘅標誌性風格結合，感覺既獨特又classic。」佢仲特別強調：「我好鍾意呢個廣告鼓勵大家以自己覺得最舒服、最自由嘅方式去展現性感。有時候，一個女人舒舒服服咁『做自己』，就已經係最性感嘅事。」

廣告推出隨即喺網上引起極大迴響，唔少網民同Fans都大讚Dakota Johnson氣質滿分，但同時亦有人對半裸尺度有所討論。不過整體而言，絕大部份人都認為廣告風格自然健康，又充滿女性魅力。至於Calvin Klein2026年春季系列，現時已經於全球門市同官網正式上架，有興趣嘅朋友不妨去了解一下。