新世代性感女神Sydney Sweeney日前為宣傳即將推出嘅自家內衣品牌「SYRN」，聯同攝製隊夜闖洛杉磯著名地標「Hollywood Sign（荷里活標誌）」，更將多件胸圍綑成數條「掛飾」纏繞在標誌上。由於行為出位，亦涉嫌觸犯法例，影片出街後隨即引起網民熱烈討論。

在 Instagram 查看這則帖子

Sydney Sweeney（@sydney_sweeney）分享的帖子

Sydney Sweeney今日透過個人Instagram發布一段影片，從片中可以見到佢身穿黑色運動衫褲、頭戴黑色CAP帽，聯同攝製隊在夜幕掩護下，孭住一袋袋黑色裝備，沿住山坡爬上洛杉磯地標Hollywood Sign。期間Sydney Sweeney更親自擒上擒落，將事前準備好嘅「胸圍串」，一排排好似晾衫咁掛喺標誌上。完事後佢仲一臉興奮，站在遠處滿意咁欣賞自己嘅「傑作」。

不過，今次宣傳手法雖然夠晒搶眼，但Sydney Sweeney及其團隊有機會面臨法律責任。據外媒《TMZ》報導，Sydney Sweeney團隊事前雖然有向FilmLA申請拍攝許可，但相關許可只限於在Hollywood Sign前方取景，並不包括接觸或攀爬標誌。而擁有Hollywood Sign版權嘅荷里活商會（Hollywood Chamber of Commerce），亦曾事先透過電郵通知製作單位，未經商會批准，不得將標誌用作任何商業用途。

商會主席亦向《TMZ》表示，Sydney Sweeney今次嘅行動並無獲得任何批准，目前正調查緊佢哋係點樣「爆」入去，亦唔排除之後會正式報警，指控相關人士涉及非法闖入及/或破壞公物。