由FromSoftware開發嘅動作遊戲《隻狼：影逝二度》，自去年8月宣布製作動畫電影《Sekiro: No Defeat》後，官方今日終於公開首部預告，並確認電影將於2026年內喺日本正式上映。

《Sekiro: No Defeat》由動畫工作室Qzil.la負責製作，並由沓名健一執導。為咗忠實還原戰國時代嗰種血腥而淒美嘅世界觀，以及刀劍交鋒嘅刺激劍戟動作場面，製作團隊破格地採用全手繪2D畫風方式呈現。從預告中可以見到狼利用鉤繩穿梭「葦名城」，以及與葦名弦一郎正面交鋒嘅精彩畫面。

除咗作畫吸引之外，最令Fans興奮嘅就係原班聲優陣容將會全數回歸，包括浪川大輔聲演「狼」、佐藤美由希聲演「九郎」、津田健次郎聲演「葦名弦一郎」、浦山迅聲演「佛雕師」以及伊藤静聲演「永真」等。值得一提嘅係，於2025年8月逝世嘅資深聲優土師孝也，亦會以生前錄音嘅方式繼續聲演「梟」。而主題曲方面，官方更選用了已故音樂大師坂本龍一嘅名曲《Blu》，進一步加強動畫嘅悲壯氣氛。電影預計今年內於日本全國戲院正式公映，至於香港方面暫時未有代理消息。