預計在明年夏天正式上映嘅《反斗奇兵5（Toy Story 5）》，近日流出一批疑似係劇照嘅渲染圖，隨住引起Fans們熱烈討論。事關相中唔見薯蛋頭先生及薯蛋頭太太嘅身影，令人擔心迪士尼會喺新一集刪走呢兩位經典角色。

OFFICIAL TOY STORY 5 FIRST LOOK #ToyStory5 #Pixar #Disney pic.twitter.com/o36TmvY7te

— Mario + Minion Dude (@mariominiondude) July 6, 2025

呢批流出照片來自Pixar工作室一篇關於動畫渲染技術嘅文章，其中一張相可以見到女牛仔翠絲（Jessie）企喺床上，俯視一眾玩具，包括牛油仔（Buttercup）、抱抱龍（Rex）、火腿（Hamm）、桃麗（Dolly）、三眼仔（Aliens）、箭豬先生（Mr. Pricklepants）以及彩姿（Trixie）。不過，巴斯光年、胡迪、彈弓狗、薯蛋頭先生同太太等經典角色就未有出現。

由於官方已確定巴斯光年及胡迪會回歸，而彈弓狗亦有喺另一張劇照現身，所以Fans們最擔心嘅係薯蛋頭夫婦嘅去向。有人猜測迪士尼可能會因為「政治正確」而刪走呢兩位角色。（順帶一提，孩之寶早幾年曾宣布為咗促進性別平等，佢哋推出嘅薯蛋頭玩具已唔再分先生同太太，統稱薯蛋頭。）但亦有Fans指出，薯蛋頭先生與太太嘅配音員Don Rickles與Estelle Harris，分別已在2017年及2022年逝世，所以迪士尼決定讓兩位角色「退休」。當然，目前一切都只係猜測，又或者純粹係呢張相冇show到薯蛋頭夫婦，留待官方後續公布吧。

《反斗奇兵5》反派「Lilypad」

據Pixar首席創意官Pete Docter透露，《反斗奇兵5》將會係一個「玩具遇見上科技」嘅故事，講述主角寶妮（Bonnie）已經8歲大，並收到一部全新平板電腦Lilypad，令巴斯、翠絲、彈弓狗等傳統玩具備受冷落，無計可施嘅玩具們只好尋找胡迪回來幫助。