現代人離婚率高企，只要你年紀有返咁上下，身邊就總有人係離婚收場。但絕大部份人結婚都唔係為咗離婚，而係以為自己搵到個可以一齊生活下去嘅人㗎嘛！咁究竟要搵個點樣嘅另一半，先可以避免最後都係孤寡過活呢？近日《DailyMail》就引述哈佛社會科學教授Arthur Brooks嘅說法，指出長久婚姻嘅最重要元素，唔係愛情、唔係激情，而係友情！

圖片：Pixabay

Arthur Brooks近日於一個Podcast節目中指出，愛情中常見嘅激情、親密元素會隨日子而變淡，其中後者變淡更加係「正常、健康，甚至以長久發展而言更可取」嘅演變。但有部份人嘅關係唔會經歷呢個過程，原因就係佢哋係非常親密嘅一生朋友，「一段幸福人生中嘅最重要元素係與某人建立夥伴關係，一個你咽下最後一口氣時都會想望住佢嘅人。」

Arthur Brooks進一步指出，無論有冇另一半，你嘅人生依然需要一啲「知道哂你嘅秘密、願意凌晨兩點接你電話同你傾好耐計」嘅人。如果另一半已經係呢個角色固然值得慶幸，但即使如此，亦需要有其他朋友作為補充。佢仲特別提到男性於維持朋友關係呢方面通常都做得好差，亦導致唔少男士於失去妻子後身邊就完全「無人無物」，生活質素大幅下降。

圖片：Pixabay

回到婚姻關係之上，Arthur Brooks指出夫婦關係嘅最大警告之一，在於二人除咗孩子之外就冇任何共同話題，於是哪怕住埋一齊都會感覺到寂寞，當孩子長大離家之後就直頭連個共同話題都冇埋。而解決方法其實亦好簡單，就係夫婦二人要搵啲其他嘅共同興趣，「睇同一本書、做同一樣運動，甚至只係有同一個宗教，都可以令關係保持強大，讓二人有共同之處。」更理想嘅狀況，係二人之間有「哲學性嘅共同興趣」，大家可以傾啲「深入嘅事」，而非只留於「換咗尿片未？」等事上交流。

資料來源：DailyMail