英女王伊莉莎白二世日前離世，其長子查理斯隨即接任成為英王查理斯三世，同時查理斯三世嘅長子威廉王子亦接任等同「太子」嘅威爾斯親王頭銜——一切睇落去都非常順理成章、非常合情合理係咪？但對於現年56歲嘅澳洲人Simon Charles Dorante-Day黎講就唔係啦！因為佢堅稱自己先係查理斯三世嘅「長子」，仲話會以法律行動逼查理斯驗DNA認親！

圖片：Simon Charles Dorante-Day on Facebook

據英國傳媒報導，現年56歲嘅Simon Charles Dorante-Day於1966年英國樸茨茅夫出生，但喺8個月大時就被一對英國夫婦Karen及David收養，而佢嘅養外祖夫母Winfred及Ernest Bowlden就曾經係伊莉莎白二世某個宮殿嘅工作人員，後來佢成家移民咗去澳洲。目前佢係一名擁有9個子女嘅工程師。

據Simon Charles Dorante-Day自己做嘅調查，查理斯與情人卡米拉於1965年變得親近，隨後卡米拉突然消失咗9個月，而查理斯就被送往澳洲，Simon Charles Dorante-Day認為原因係二人「搞出人命」，即係佢自己。佢話卡米拉生咗佢之後，利用皇室嘅力量將佢隱藏起來，但後來因為佢漸漸長大，於是卡米拉安排一名宮殿工作人員個女收養佢，後者就即係其養母Karen Day。佢仲話佢嘅養外祖母曾經多次親口同佢講，佢係「卡米拉與查理斯個仔」。而佢亦聲稱小時候有一個佢認為係卡米拉嘅女人會黎探望佢。如果佢所言屬實，加上卡米拉正式成為皇后，理論上佢就係查理斯嘅嫡長子。

圖片：Simon Charles Dorante-Day on Facebook

其實Simon Charles Dorante-Day多年前就已經對外聲稱自己嘅生父母係查理斯及卡米拉，佢個Facebook亦經常貼出佢本人、佢啲仔女及皇室成員等人對照相片，以證明佢同皇室成員有幾似樣。佢甚至嘗試透過法院，要求英國皇室交出查理斯嘅DNA資料，以驗證佢嘅血源。而隨住查理斯接任英王、威廉王子接任威爾斯親王，佢又再開始上水。

佢喺接受澳洲傳媒7News訪問時話，「好難唔將查理斯將威爾斯親王頭銜畀咗威廉呢件事，當成係踩到上我心口。我都唔想咁諗，但我真係咁覺得。我認為查理斯最少可以畀個答案我——認返我呀！佢畀個頭銜威廉，咁我個答案呢？我個DNA測試呢？如果你唔係我老豆，咪證明你唔係囉！」

資料來源：DailyMail、7News