雖然早前有研究顯示Z世代認為老餅先用「笑到喊」，但呢總體上仍然係最多人用嘅Emoji，唔知大家又最鍾意用咩呢？定係已經轉晒用Sticker喇？

最近Adobe發布《2022年全球Emoji使用趨勢報告》，針對5,000用戶進行調查，發現有75%用戶每日都會Send超過50個Emoji，並認為使用Emoji能令彼此更親密，有7成人更會喺工作上使用Emoji。

根據調查結果，美國最多人用嘅5款Emoji分別係「笑到喊」、「豎起手指公」、「紅色心心」、「笑到轆地」，以及「哭臉」。至於最討厭嘅Emoji則係「便便」、「憤怒臉」、「臉紅」。雖然各個州份排名上有些出入，但大致上都係個幾款Emoji。

相信大家都試過，有時用一個自以為中性或者冇咩特別嘅Emoji，卻被對方負面解讀，認為你係暗串佢，甚至性騷擾。報告就指出最常被人錯誤解讀嘅Emoji分別係「頭戴牛仔帽」、「櫻桃」及「上下顛倒笑臉」，唔想令人誤會就盡量唔好用喇。有興趣嘅朋友可以參考完整報告了解更多。