Magrette係一間紐西蘭Auckland嘅腕錶品牌，香港可能比較少聽，但號稱係西方嘅窮人恩物 (唔係400萬一層樓嗰種)。佢地標榜原創性嘅設計同埋合理親民嘅價錢，上佢地官網睇啲錶款，都係幾百美元左右，唯一比較麻煩嘅係要預訂，例如今次呢隻用返瑞士機芯嘅Magrette Moana Pacific Professional Black只係造500隻，預計2017年2月25號先起貨。

Moana Pacific Professional其實係舊款嚟，44mm嘅潛水錶款，舊版本身係用Miyota 9015機芯，平民腕錶之中極之常見，而新版則採用瑞士製嘅STP1-11自動上鏈機芯，屬於平價之寶ETA 2824嘅複製版，擁有26粒寶石，振頻每小時28,800次，提供到44小時左右嘅動力儲存。

新版換上一個質感極好嘅黑色DLC-coated精鋼錶圈，Finishing睇落相當出色，上面嘅雕度用咗Super Luminova BGW9，睇落去更加亮麗。隻錶而家官網做緊嘅預購價係US$545，shipping US$35，跟朱古力色皮錶帶同黑色NATO帶各一，性價比超高！