捱咗一個星期，終於黎到星期五，可惜嘅係Weekend只有兩日，而早排注金多寶又唔中，所以星期一又要返工……你會唔會好似大部份香港人咁，一諗起返工就覺得好大壓力？日本Twitter近來就流傳一個超過20萬人讚好嘅「抗返工壓力方法」，而且做法非常簡單，就係唔著底褲！

卻說日本Twitter用戶「オクシン (@OKU_MAYA)」日前分享咗一件趣事，就係話有個豆腐心朋友同佢講，每次當佢要開啲令人憂鬱嘅會、又或者覺得返工好煩，佢就會唔著底褲返工。咁嘅話就算返工真係遇到啲咩唔開心事，都會因為太過在意自己冇著底褲而完全唔會在意，進入「無敵嘅心態」。「オクシン」話自己聽到都嚇一跳，仲話自己可能都會試下。

結果呢個故事於日本Twitter廣為流傳，更有超過20萬人讚好，似乎唔少人都認同呢個「唔著底褲返工抗壓方法」。

豆腐メンタルの友人が、憂鬱な会議があるときや仕事が面倒くさいと感じたとき「とりあえずノーパンで仕事に行く」と言ってた。仮に嫌なことがあっても全ての意識がパンツを履いてない方に向いて、メンタルが無敵になると話していた。そういう精神安定剤もあるのかと驚いた話。今度、試してみようかな

— オクシン (@OKU_MAYA) October 25, 2021

唔少日本網民都留言話，睇黎真係應該要試下，甚至有女性留言話如果著裙再使出呢個「唔著底褲抗壓法」，真係會諗唔到其他嘢；亦有人話如果單純只係想分散注意力嘅話，其實仲有好多方法，例如佛教中都有「將注意力集中於腳底」嘅修行。另外亦有人認為，「オクシン」個朋友夠膽唔著底褲返工，根本就唔係咩「豆腐心」，而係「鋼鐵心」。當然，亦有人擔心用得多「唔著底褲抗壓法」會產生新嘅性癖，甚至「再進一步」成為露體狂。

黎緊星期一又要返工，唔知大家有冇興趣試下呢個方法有冇用？