FB、IG會Delete裸照、甚至太少布嘅相並唔係啲咩新鮮事，呢個規矩唔單止令好多以身體為傲嘅創作者被刪文又或整個帳戶被Ban，甚至連美術界都開始覺得佢煩。好似位於奧地利維也納嘅一眾美術館就忍夠FB係咁Del佢哋啲文，所以決定走去OnlyFans上展示佢哋嘅藝術收藏。

維倫多爾夫的維納斯 (Venus of Willendorf)

事情嘅起源，係一眾維也納美術館過去都曾經試過宣傳「有祼體」嘅藝術品或藝術展覽，而被FB或IG刪文。例如維也納自然歷史博物館就曾於2018年希望宣傳一件來自舊石器時代、形象係一個裸體豐腴女性嘅「維倫多爾夫的維納斯 (Venus of Willendorf) 」小雕塑，結果呢個唔會勾起任何正常人性幻想嘅小雕塑就被FB刪文；另一當地著名美術館阿爾貝蒂娜 (The Albertina) 就曾經因為展示日本攝影大師荒木經惟嘅作品而被TikTok封鎖。而其他美術館亦曾遇到過大大小小類似事件。

於是喺當地旅遊局嘅帶領下，一眾維也納美術館就將「十八禁」館藏放上OnlyFans，等大家能夠於網上欣賞。目前維也納旅遊局個OnlyFans月費為4.99美金，訂閱者仲可以免費得到當地旅遊卡，以及能夠免費入場其中一間有份參加是次計劃嘅當地美術館。

維也納旅遊局主管Norbert Kettner指，佢哋開OnlyFans唔係公關技倆，而係希望開展一個關於現有審查制度、社交媒體及其演算法於美術中的角色嘅討論。Kettner仲話因為社交媒體嘅限制，依靠呢啲渠道接觸欣賞者嘅當代藝術家亦必須要進行自我審查。維也納Leopold美術館發言人Klaus Pokorny亦坦言：「我哋都唔想開OnlyFans，但FB、IG、TikTok都唔畀我哋Post」，佢仲話「去到今時今日裸露嘅身體都仲能夠成為爭議，都可以話係荒謬。」