懶瞓先係王道！早起身易死啲架！

文：MenClub 魏文青　　
POSTED ON 17 Jun 2018

「早睡早起身體好」呢句嘢由細到大聽過無數次，但以現代都市人嘅生活節奏，遲睡然後被逼早起返工已經係常態，難得去到週末，你又係咪會堅持早起？喺你較鬧鐘之前要冷靜啲諗下，因為根據瑞典同美國臨床醫生嘅研究，早起係會易死啲架。

準確啲黎講，係「唔夠瞓會易死啲」，問題係點為之「唔夠瞓」呢？該項研究追蹤咗超過43000名受訪者過去13年嘅睡眠習慣，發現如果平日只係瞓少於五個鐘，而週末又繼續保持呢個睡眠時數嘅人，死亡率會比週末瞓晏啲(7小時)嘅人高52%。另一邊廂，如果你瞓得多(9小時)，又唔見得你死亡率會比較低。換言之如果你平日因為各種原因瞓唔夠，星期六日最好就儘量補眠啦。

所以以後大家星期六日瞓到黃朝白晏都唔使太內疚架——你唔係浪費生命，而係珍惜生命架！