上次講完英超頭三位，打完一輪英超形勢又有少少唔同，今次講嘅球隊都係前四名，歐聯席位嘅競爭者。歐聯席位除咗係強隊嘅證明，背後可以帶嚟極大嘅經濟利益，為面子為銀紙，喺呢個階段嘅球隊一定會搏盡。

熱刺 （42分）

自從普捷天奴由修咸頓過檔後，熱刺嘅實力就穩步上揚，證明球會當初搵啱領隊，所以熱刺喺暑假已經同普帥續約。以往熱刺最令人擔心嘅相信係後防，而普捷天奴嚟到有呢個問題得到顯著改善，最估唔到係今季熱刺係全英超失球最少嘅球隊，而歐聯提早出局後，相信熱刺會連歐霸都放棄埋，一心打好聯賽。只要保持表現穩定，要壓過死對頭阿仙奴唔係無可能，至於英超冠軍？車仔fit成咁睇怕都幾難。

阿仙奴（41分）

酋長球場嘅債一早還完，基本上阿仙奴已經無「淨係爭前四」嘅藉口，反而更應該力圖爭奪英超冠軍。但目前最大嘅問題始終係合約問題，雲加仍未同阿仙奴續約，令隊中巨星難以決定前途。奧斯爾聖誕及新年期間缺陣引起外間對佢下季係唔係仍然留隊提出疑問，不過雲加已經回應因為奧斯爾身體不適先缺陣同無練波。不過更值得批評係無論管理層、領隊、球員甚至球迷都好似無乜要求。上輪英超對般尼茅夫，基奧特入波追成3-3竟然當贏咗咁慶祝，再望望山齊士仲係充滿鬥心想拎走3分嘅眼神，你就知問題出喺邊。就算奧斯爾開晒口話願意留隊，山齊士都未必會留低。至於成績，如果阿仙奴繼續咁hea，前四不保都唔需要驚訝。

曼聯（39分）

如果話曼聯係聖誕快車表現最佳球隊相信無人會反對，事關佢哋12月賽事贏晒6場拎足18分。對比成績，相信球迷更開心球隊開始有隊形，4個新援都有貨交。伊巴謙莫域視年齡為無物，照入13球成為球隊首席射手；普巴入球同助攻數字唔算起眼，但減少上腳後表現都開始對辦，最值得講一定係米希達恩，季初被雪以為被摩連奴彈鐘，不過近期已經搵到自己位置，相信未來可以繼續貢獻球隊。不過中堅方面，因為拜利要踢非洲國家盃，所以黎緊一個月曼聯只有洛祖、鍾斯同史摩寧三個選擇。而且星期六主場對利物浦一戰事關重要，對能否殺上前四可能就睇呢場啦！

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。