自從摩連奴帶領國際米蘭贏過三冠王之後，國米好似都無乜運行。球隊城績一落千丈，以前明明係歐聯常客，到而家爭取歐洲賽資格都成問題。上季或者最衰都係文仙尼，本來可以殺入歐聯但又得第四打歐霸盃。唔緊要，換人咪得囉！喺阿積士搵咗法蘭迪保亞過嚟接手，點知仲衰過以前。好啦，上星期國米就正式炒人，點知就仲有隊中阿根廷射手兼隊長伊卡迪嘅品德問題得罪晒全部國米球迷。問題多多，成績又唔好，睇怕藍黑軍團呢季都係咁先。

話時話，法蘭迪保亞都幾慘架！佢可以話係近年最成功嘅荷蘭新一代領隊。喺阿積士首次坐正做領隊就連續四季贏到荷甲冠軍，一直有傳唔少英超球隊都想搵佢加盟。教咗阿積士6年，真係時候出去闖下，如果可以幫國際米蘭重振雄風都係一個創舉，所以先吸引到法蘭迪保亞轉會執教。不過佢嘅意甲之旅並唔順利，意甲打左11輪只得到4勝2和5負嘅成績。講真，文仙尼幫球隊拎到歐洲賽資格其實算唔錯，不過大陸班主想更上一層樓，於是搵法蘭迪保亞執教。但新人事新作風又唔代表一定好嘅，而家炒領隊對國米同法蘭迪保亞都係雙輸。

泰利同傑斯偷食隊友妻兄弟妻人人得而誅之，不過最少無周圍唱，但係隊長伊卡迪嗰種賤格法真係唔講得笑。伊卡迪現任太太Wanda係同胞麥斯盧比斯前妻，伊卡迪竟然喺新推出嘅自傳大爆點樣撬佢牆腳，順手激嬲埋國米激進球迷組織Ultras。上個月國米主場對卡里亞里嘅比賽，伊卡迪射失12碼，但主場球迷竟然拍爛手掌，最後場波國米以1-2輸埋。你可能奇怪點解國米球迷咁憎自己隊長，其實係因為喺2015年，伊卡迪講過自己可以搵100個阿根廷黑幫對付球迷！身為隊長竟然恐嚇球迷，唔使俾球隊解約算偷笑，國米球迷聯署要求會方禠奪伊卡迪隊長資格，不過國米就考慮緊。如果議員宣誓講多幾隻字就唔做得議員，咁伊卡迪無隊長做都唔係好過份啫，有乜好諗呢？

國米秒炒法蘭迪保亞同中方資本入主國米都好有關係，你望下中超球隊點搞足球就知。除咗用錢追求即食足球之外，中國足球根本無歷史同內涵，對國內足球發展同國家隊表現完全無作用。我哋國家主席習近平出晒名係球迷，又發表過自己嘅「中國足球夢」，前年外訪英國都要去曼城主場行個圈，相信大家都明點解中國商人點解咁比心機搞足球。保方講得好架，中國財團入主意大利傳統球會對意大利足球係重大挫折，但又無法，歐洲經濟唔好，中國財團有機可乘。見微知著，其實唔止國際米蘭，成個意大利足球要復興，都要面對唔少障礙。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青