文：李羅渣

圖片：紐卡素官網

老老實實，到今日為止我都唔明點解仲有英超球隊會搵麥卡倫教波，一間球會會搵一個可以帶領英格蘭歐洲國家盃外圍賽出局，親手將打比郡打英冠升班附加賽機會拱手相讓嘅領隊，原因只有一個，就係想降班。不過紐卡素都懸崖勒馬，喺英超主場1-3輸俾般尼茅夫之後，到尋晚就炒咗領隊麥卡倫，仲即時請咗前皇馬領隊賓尼迪斯返嚟幫手護級，乜死肥佬艾殊利呢次咁好眼光呀？

圖片：metro.co.uk

以紐卡素嘅人腳，要教到護級仲難過拎英超，入面有告魯爾、維拿杜姆、真馬特、艾約斯、米爾杜域、杜美特、安尼達等等，唔係國家隊骨幹就係明日之星，真係搵你阿媽教都起碼中游。麥卡倫可以教到而家打咗28場先得24分排尾二，簡直係足球界奇跡。其實以佢嘅成績，1月就應該要炒佢，起碼搵到個新領隊都可以有時間救亡。去到呢個位，有啲朋友可能都會諗起本來教得好地地但紐迷唔多鍾意嘅柏祖，去咗水晶宮嘅佢就話自己一樣感受到麥卡倫嘅壓力，其他就無點多講啦。

圖片：紐卡素官網

舊嘅唔去新嘅唔嚟，估唔到紐卡素搵到賓尼迪斯嚟救亡，今次唔係好似教車路士咁做替工，而係簽三年約。喺皇馬被炒後咁快搵到新工，都算係可喜可賀嘅。喺紐卡素官網嘅訪問肥賓就話佢今次回歸英超對佢自己、球員、職員同球迷都係一個挑戰，而大家都向住同一個目標出發，無論球會同佢自己都好需要球迷支持同投入。第二度重返英超嘅佢，對於可以同自己家人更近都係好開心嘅。

圖片：liverpoolecho.co.uk

係時候講正題，咁到底賓尼迪斯可以幫紐卡素留喺英超定係再度「挑戰」英冠呢？講賽程，紐卡素仲有九場聯賽未打，肥賓第一場比賽就會對榜首嘅李斯特城、4月9日就作客修咸頓、4月23日就重返晏菲路倒戈鬥利物浦、4月30日就主場對水晶宮、仲有未定日子嘅主場鬥曼城。聽落賽程都唔算係易打，不過形勢上紐記都仲係樂觀嘅，今季護級嘅競爭對手主要都係同紐卡素同分排緊18嘅諾域治，而排17嘅新特蘭只係領先一分，包底嘅阿士東維拉提早投降，史雲斯雖然排16，不過都領先成9分，總結嚟講，有肥賓助陣，紐卡素護形勢都係樂觀嘅。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。

facebook: https://www.facebook.com/leerogerfcpage/