由Ryan Gosling主演，改編自2015年電影《The Martian》（火星任務）原著小說作者Andy Weir另一小說嘅《Project Hail Mary》（末日聖母號）即將上映。淨係睇預告你都知故事發生於外太空、有壯觀嘅太空景像又有外星人，不過近日導演 Christopher Miller就頗為自豪地對外宣佈，整部電影156分鐘中，完全無用到任何綠幕拍攝，可以話係「實景」拍攝——當然唔係將Ryan Gosling送上外太空啦！

話說日前Christopher Miller接受《Comicbook.com》訪問時透露：「套戲有趣嘅地方在於我哋無使用任何綠幕——或者藍幕。成隻太空船嘅內部都係真實搭建嘅佈景，外面亦搭咗一大截船身出黎。至於入面嘅外星人Rocky亦真係『在場』參與拍攝。咁做容許拍攝團隊自由地為場景打光、自由地擺放鏡位去尋找最好嘅瞬間，唔使估Rocky最終會出現於邊個位置。所以套戲先會感覺咁真實同自然。」

據報《Project Hail Mary》嘅製作成本高達2.48億美金，相信當中好大部份都係用於搭建拍攝需要嘅實景。有報導亦仍為於目前科幻、奇幻、超級英雄片都狂用綠幕以至AI拍攝時，《Project Hail Mary》號稱「實景」應該會成為唔錯嘅賣點。

但大家要知道「綠幕」同「視覺特效」（VFX）係兩件唔同嘅事。Christopher Miller事後亦於X上補充：「唔用綠幕唔代表無任何VFX鏡頭，事實上，成套戲係有2018個VFX鏡頭。我哋的確係搭咗成個太空船內部出黎，但仲有好多嘢威也要執走、天花板要換。」同時佢亦提到太空船外部以及壯麗嘅太空景色係由著名VFX團隊ILM製作，而外星人Rocky就係Framestore結合真實人偶以及動畫的結果，「以及好多其他人嘅優秀作品」。

呢套戲嘅早期試映口碑已經相當驚人。有影評人形容係「深刻感人、充滿人性光輝嘅傑作，同時極具娛樂性」，另有人指電影「結合《引力邊緣》嘅視覺震撼、《火星任務》嘅解謎快感與《星際穿越》嘅磅礴情感，同時保留自己獨特嘅風格」。三套片嘅優點合體，任何一個形容已經夠勁，三個連埋更加係誇張，的確令人相當期待。

資料來源：The Hollywood Reporter