為咗慶祝Pokémon系列30周年，官方最近推出咗一件對老Fans極具吸引力、好容易就忍唔住手畀錢嘅情懷玩具「Pokémon紅/綠遊戲音樂機」。呢部機表面上係一部超迷你版初代Game Boy，但實際上佢並唔係用嚟打機，而係一部專門重溫初代遊戲BGM嘅音樂播放器！

外型方面，呢部音樂機忠實還原咗當年厚重嘅初代Game Boy，但體積就縮細到得返大約8.5cm高，連埋電池都只係重53g，啱啱好可以一手掌握。機身嘅十字掣、A/B掣、螢幕邊框，甚至連喇叭嘅坑紋都跟足原版設計，就算平時唔開聲，淨係當一件復古擺設放喺枱頭，或者當做掛飾帶出街，都已經相當搶眼。不過美中不足嘅係，機上面啲掣只係造型，冇得真係撳。

而呢件產品最好玩嘅地方，就係成個套裝會附送足足45餅迷你版遊戲卡帶！每餅帶都對應一首初代《Pokémon紅/綠》入面嘅經典BGM，例如純白鎮、野生Pokémon出現、踩單車、治療Pokémon音樂等等，而卡帶背後仲印有對應嘅遊戲場景。你想聽邊首，就要好似當年打機咁，親手將卡帶「啪」一聲插落部機背後，充滿情懷同儀式感。官方仲特別強調，部機主打重現當年Game Boy喇叭嘅獨有音效，意味住大家可以預期聽到嗰種「拆拆哋」、帶少少Lo-Fi感覺嘅8-bit電子音樂，保證原汁原味。

售價方面，呢部「Pokémon紅／綠遊戲音樂機」定價為 9,900 日圓（約 HK$490），由即日起可以去日本Pokémon Center或日本任天堂官網申請抽籤。至於台灣方面，售價為2,400新台幣（約 HK$595），並會將於3月14日起於Pokémon Center TAIPEI正式發售。