由《Morbius》掀起「It’s Morbin’ Time」尷尬Meme，到連主演Dakota Johnson都唔想宣傳嘅《Madame Web》，再加上反應平平嘅《Kraven the Hunter》，Sony蜘蛛俠宇宙（SSU）可謂屢戰屢敗。面對接二連三嘅票房失利，Sony高層終於決定痛定思痛，宣布全面重啟SSU，並交由全新班底負責。

Sony Pictures電影集團主席Tom Rothman日前接受Podcast節目《The Town》訪問，當被問到「SSU是否已死？」時，佢斬釘截鐵回答「No」，並透露Sony會喺某個時間點全面重啟，而且會交由全新班底負責，不過就未有進一步透露具體細節。

回顧SSU過去嘅成績，除咗Tom Hardy主演嘅《Venom》系列尚算叫座之外，其餘作品幾乎全部成為影迷笑柄，特別係《Madame Web》同《Morbius》嘅災難級表現，嚴重打擊咗 Sony建立自家宇宙嘅公信力。除咗電影本身製作水準參差之外，SSU最大嘅致命傷就係「名為蜘蛛俠宇宙，但入面根本冇真正蜘蛛俠！」礙於版權問題，Sony一直未能自由運用主宇宙蜘蛛俠角色，只好將焦點放喺反派配角或反英雄身上，但呢啲角色嘅魅力好大程度源自佢哋同蜘蛛俠嘅互動（對立面），如果只拍佢哋嘅起源故事，自然難以令觀眾投入。

針對呢個問題，據聞Sony重啟後將放棄單純嘅「反派宇宙」路線，轉為聚焦在蜘蛛俠嘅多個變體，例如Spider-Gwen或Spider-Punk。而由Nicolas Cage主演嘅劇集《Spider-Noir（暗影蜘蛛俠）》亦將於5月27日正式播出。呢部作品嘅成敗，預計將直接影響SSU重啟後嘅風格走向。唔知大家又覺得SSU重啟後，要拍啲咩先吸引到你入場呢？