自《阿凡達：火與燼（Avatar: Fire and Ash）》展開宣傳以嚟，身兼導演同編劇嘅James Cameron就對系列前景轉趨保守，直言如果今集票房未如理想，無法說服迪士尼繼續投資，佢就會放棄拍攝第4及第5集，改為寫書交代故事結局。不過最近佢又提出另一個想法，就係開記者招待會交代劇情。

雖然迪士尼早已為《阿凡達4》同《阿凡達5》排好上映檔期，分別於2029年及2031年上映，而且《阿凡達4》其中一小部分內容，亦喺拍攝《阿凡達2》及《阿凡達3》期間完成，但James Cameron已經做足心理準備，接受呢兩部續集有機會「胎死腹中」。佢最近出席宣傳活動時曾多次強調，《阿凡達》系列能否繼續，全取決於《火與燼》嘅票房表現：「我都唔知呢個系列可唔可以繼續發展落去，我梗係希望可以啦。但你知啦，每一次推出新一集，我哋都要證明到有商業價值先得。咁樣啦，如果真係拍唔成第4同第5集，我會開一個記者招待會，直接同大家交代故事會點樣發展。」

除此之外，James Cameron另一個夢想係親自寫書交代餘下劇情，並指出：「呢啲角色背後蘊藏住豐富嘅文化、故事背景及細節，而且都係經過精心打磨。我真係好想好細緻咁將呢啲細節位呈現畀觀眾。」不過，佢亦無奈承認，寫小說呢種商業模式已經行唔通，皆因現代人愈嚟愈少睇書（有研究指美國休閒閱讀人數近20年下降了超過40%）。即使如此，佢仍然覺得有一本官方、正統嘅作品去記錄《阿凡達》整個故事藍圖，可能係一件好事。

雖然James Cameron似乎已經「打定輸數」，但《阿凡達：火與燼》上映踏入第二個星期，票房走勢依據強勁，載至目前全球票房已累積7.6億美元，業界預計踏入跨年檔期電影會繼續吸金。至於最終能否交出一個足以令迪士尼拍板續集嘅成績，甚至好似前兩集咁突破20億美元大關，仍有待時間證明。