正如每到農曆新年香港人都要睇《嚦咕嚦咕新年財》，外國人過聖誕其實都有一系列「聖誕電影」可以睇，而由Jim Carrey主演嘅2000年電影《How the Grinch Stole Christmas》（港譯《聖誕怪傑》）更係唔少人嘅必睇之作。適逢今年係電影25週年，於是包括Jim Carrey在內嘅《聖誕怪傑》台前幕後早前就接受《Vulture》訪問回顧電影，導演Ron Howard更指Jim Carrey於開拍第一日就想退錢辭演，最後劇組要搵個於軍方訓練士兵捱過酷刑嘅專業人士黎，協助Jim Carrey捱過電影拍攝。

據負責電影特技化妝、仲憑此拎埋奧斯卡最佳妝髮嘅Rich Baker指，片商Universal一開始係打算將Jim Carrey成個人油綠色就算，「我哋畀2000萬美金請佢返黎，我哋要見到Jim Carrey本人」。但Rich Baker認為咁樣做根本就唔係故事中嘅「Grinch」，於是佢自行研究整套特技化妝，並放料畀相熟媒體造勢，結果Universal逼於輿論壓力接受特技化妝方案。

Jim Carrey本人其實亦支持全身特技化妝，但佢就低估咗呢個選擇嘅後果。據佢於訪問中回憶，由於Grinch個鼻型比較奇怪，上咗妝之後Jim Carrey本人個鼻窿係對唔上Grinch個鼻窿，而又因為劇組無辦法於面具上開孔，所以整個拍攝過程佢都要用口呼吸；套衫佈滿令人極度痕癢嘅細毛，而佢本人又戴住10寸長嘅假手指，所以連搲痕都唔得；對眼仲戴住覆蓋整個眼球嘅隱形眼鏡，所以佢嘅視野範圍得返一個窿仔。再加上化妝過程長達8個鐘，令佢成個拍攝過程都痛苦不堪。

圖片：IMDB

電影導演Ron Howard更指出，拍攝早期Jim Carrey就因為太唔舒服而恐慌發作，「轉場時我見佢瞓喺地下，睇落去非常慘」，而且拍攝第一日就威脅要辭演，「佢打算退返2000萬美金畀我哋，佢睇落非常真心！」

最後劇組搵黎前美國海軍中校與海豹部隊隊員、海豹部隊第六小隊以及紅細胞部隊創立者、當時專門訓練美國軍方人員捱過酷刑與拷問嘅Richard Marcinko黎幫手。簡單黎講就係教Jim Carrey點樣捱過去。「佢教我當開始沉淪時我可以做啲咩。例如用盡全力打自己隻腳、搵個信得個嘅朋友打佢手臀、見到咩就食咩、改變房間內嘅狀態，例如本身有個電視開住嘅就熄咗佢、以及不停食煙——有張相係影到我著住成身Grinch裝束坐喺導演櫈上，拎住個好長嘅煙咀食煙，因為如果我唔用煙咀，支煙會燒著件衫上面嗰啲毛！」

Jim Carrey亦點名多謝著名樂隊「Bee Gees」，表示自己就係靠聽哂佢哋所有歌捱過超長嘅化妝過程。「佢哋啲歌真係聽到人好開心。我無見過Barry Gibb（Bee Gees中嘅長男），但我好想多謝佢。」

資料來源：Vulture