近日前KONAMI高層接受訪問時，表示當年《Matrix》導演Wachowskis姊妹（當年仲係兄弟）曾經誠意邀請小島秀夫製作《Matrix》遊戲，但遭到KONAMI高層火速拒絕，令呢次重鎊跨界合作未能成事。更甚嘅係，小島秀夫事後發文表示，當年根本無人同佢講過有呢個機會，換言之KONAMI於下決定前根本無問過佢意見——都算係小島秀夫與KONAMI之間恩怨嘅縮影啦。

據外媒《Time Extention》報導，早於1999年左右，坊間就有傳聞指Wachowskis姊妹打算搵KONAMI製作《Matrix》遊戲，但好明顯就無成事。咁啱《Time Extention》又因為其他事而有機會訪問到前KONAMI授權副總裁Christopher Bergstresser，於是就去問佢知唔知當年發生咩事。

而Bergstresser就指出，當年Wachowskis姊妹當年已經係小島秀夫嘅Fans，於是佢哋主動搵KONAMI商討開發遊戲事宜，甚至帶埋發明子彈時間嘅電影特效主管John Gaeta去同KONAMI傾。Bergstresser指當年KONAMI方在場人士有佢本人、KONAMI CEO Kazumi Kitaue、小島秀夫，以及另一製作人齊藤昭義。而當Wachowskis姊妹向小島秀夫提出要佢幫手製作遊戲後，CEO Kazumi Kitaue只係簡單回應一句「No」拒絕合作，話題就係咁樣完結。

如果事情只係咁嘅話，其實大家都只可以婉惜呢個重鎊合作未能發生。不過Bergstresser訪問出街之後，就引來小島秀夫於X上發文回應。據小島秀夫指出，當年KONAMI與Wachowskis姊妹之間嘅會議佢唔單止唔在場，甚至過去咁多年黎都無人同佢講過Wachowskis姊妹曾經邀約佢製作遊戲。

據小島秀夫指出，當年《Matrix》未於日本上映之時，佢就已經喺美國自己入場睇過，亦同Wachowskis姊妹私下有聯絡。而Wachowskis姊妹去到日本宣傳電影當日，佢先於早上同佢哋一齊接受《Fami通》訪問，然後下晝返到公司時，Wachowskis姊妹啱啱同KONAMI CEO Kazumi Kitaue開完會。換言之佢根本就無直接收到Wachowskis姊妹嘅邀約。

小島秀夫亦指，當年佢正忙於開發《Metal Gear Solid 2》，的確無辦法立即開始製作《Matrix》遊戲。但如果當年有人同佢講過呢單嘢的話，話唔定會搵到方法兩邊兼顧。

資料來源：Time Extention