早前我哋曾經報導過，荷里活傳統大廠之一嘅Warner Bros. Discovery (以下簡稱WBD）有意出售，吸引Netflix、Comcast、Sony等其他大廠對其整體或部份業務虎視眈眈。不過最新消息就指出8月先完成合拼嘅Paramount Skydance (以下簡稱 PSKY) 係目前最有力嘅競爭者，事關佢哋唔單止錢多，仲有美國總統特朗普嘅支持。

早於去年7月，就已經有報導指WBD高層研究緊將公司分拆，亦唔排除出售部份業務；而去到今年9月時《Wall Street Journal》就指當時剛剛完成合拼嘅PSKY有意收購整個WBD，隨即引起其他大廠加入爭奪。

據《Deadline》近日報導，PSKY於10月11日第三次向WBD出價，希望以每股23.5美金嘅價錢全面收購對方，不過再次遭到拒絕。有財經分析師估計最終成交價應該係約每股30美金，換言之PSKY目前嘅出價其實同目標價差幾遠。另一邊廂，有報導指出Netflix、Amazon、Comcast等亦對WBD相對有興趣，只係外界未知佢哋幾時、會唔會有真正行動；而早前亦有報導指Sony對WBD旗下嘅串流業務（即HBO Max）有興趣。至於媒體業務近年步上正軌嘅Apple，就可能因為要集中應對AI發展落後嘅問題而不會加入爭奪。

但即使其他大廠似乎有興趣加入爭奪、即使PSKY多次出價遭拒，佢哋仍然被視為當中最有力嘅競爭者。背後原因講到尾其實得一個：Skydance創辦人David Ellison老豆係Oracle創辦人、世界首富第二名Larry Ellison。有Larry Ellison支持就代表PSKY擁有其他人望塵莫及嘅財力，足以用錢撻到WBD肯賣為止。另一方面，Larry Ellison係美國總統特朗普嘅忠實支持者，而特朗普應該會希望WBD落入自家陣營，以增加其媒體影響力。換言之美國政府可以對PSKY收購WBD大開綠燈、並增加其他競爭者嘅爭奪難度。

資料來源：Deadline