於1892年成立、至今有近133年歷史嘅Kodak於早前舉行嘅財政報告會議中，對外發出公開警告，指公司無力償還即將到期近5億美金償務，一度引起Kodak是否會倒閉嘅猜測。不過近日Kodak高層再次發出公告，指出之前嘅「警告」只係為咗符合美國會計法規，Kodak已經有方法解決大部份嘅債務，並重伸公司不會結業。

卻說Kodak於美國時間本週一時舉行季度財務報告會議中，指出公司面臨即將到期嘅5億美金債務，而公司「無可靠嘅融資方法或足夠嘅流動性」去償還該批債務，並「令人對公司持續經營的能力產生重大疑問」。由於公告將個情況講得非常嚴重，所以唔少人都猜測呢間歷史悠久嘅著名企業是否即將倒閉。

不過近日Kodak首席行銷長兼歐、非、中東地區銷售主管Denisse Goldbarg就對外發文，表示情況其實遠無財務報告會議中講得咁嚴重。佢指出雖然Kodak依家的確無足夠嘅現金去償還債務，但到今年12月就會透過取消退休基金，拎出營餘部份，即近3億美金黎還債，而剩餘嘅債務就會以修改、延長、重新融資等方法處理。換言之絕大部份債務都會被解決，公司嘅營運亦唔會受影響。

Denisse Goldbarg亦指出，之所以要於財務報告會議講到咁嚴重，係因為相關債務會於12個月內到期，而「拎退休基金出黎還」嘅呢個方法並非美國會計準則中嘅「合適辦法」，所以按規矩必須話自己無力償還。佢甚至強調還清上述嘅債務之後，Kodak基本上會成為一間零負責公司，財政報表會比之前更加健康。

資料來源：The Verge、plansponsor