導演認為，大家已經喺遊戲體驗過Leon嘅故事，所以佢唔想照辦煮碗翻拍一次，而係會基於遊戲世界觀，創作出一個全新故事。唔知呢部電影會好似Milla Jovovich版本咁大改特改，定還是好似《Fallout》真人版劇集咁，改編到原作黨同新觀眾都滿意呢？

自從片商Constantin Film宣布再拍《生化危機》真人版電影，並搵嚟新銳恐怖片導演Zach Cregger操刀後，唔少機迷都好希望睇到一個忠於原作，最好有Jill Valentine同Leon S. Kennedy等經典角色嘅真人版改編。不過，各位原作黨可能要失望啦，事關Zach Cregger日前接受《Inverse》訪問時表明，呢部電影將會係一個「全新故事」，同遊戲主線角色無關。

Milla Jovovich主演嘅《生化危機》雖然被批評「掛羊頭賣狗肉」，但就長拍長有。

Zach Cregger解釋：「我係遊戲嘅忠實Fans，所以我所寫嘅故事就好似一封送畀遊戲嘅情信，並嚴格遵循遊戲設定。係一個忠於遊戲世界觀，但劇情節然不同嘅故事。我唔會講重複講述Leon嘅故事，因為呢啲已經喺遊戲入面講過晒，而Fans們亦都體驗過相關內容。」另外，佢接受另一間傳媒《THR》訪問時仲提到，呢個原創故事非常「怪誕（weird）」，劇情同以往任何一部《生化危機》電影毫無關連，認為觀眾將會感受到一種新鮮、前衛及怪誕嘅感覺。

呢部全新《生化危機》電影將由Zach Cregger執導，並聯同《John Wick 3 & 4》、《Ballerina》編劇Shay Hatten共同撰寫劇本，預計今年夏季開拍，暫定2026年9月18日上映。究竟Zach Cregger可唔可以拍出一部令老Fans同新觀眾都滿意嘅作呢？敬請大家拭目以待！