繼2015年「LEGO IDEAS 21303」後，LEGO事隔十年再次推出Pixar動畫《太空奇兵·威E（WALL-E）》模型。而且今次除咗有主角威E，就連伊芙（EVE）、清潔機械人毛仔（M-O）同小蟑螂（Hal）都有份！

呢款模型由811塊零件組成，專為18歲或以上嘅成人玩家而設，主打精緻嘅展示效果。雖然比起2015年嘅21303版本，今次嘅威E模型略為縮細咗少少，但細節同可玩性就大大提升！除咗忠實還原威E經典方形機身同可滾動履帶設計，頭部同手臀都配備了可動關節，能夠擺出各種pose。而且心口嘅儲物箱仲可以打開，放入壓縮成方塊狀嘅垃圾。

至於伊芙，官方就採用大量弧形積木還原出其流線型機身，並用上藍色透明磚塊呈現懸浮效果，頭部同手臀都同樣可動，而心口更藏有電影經典道具「靴中植物」（The Plant）等細節。至於毛仔同小蟑螂Hal雖然係配角，但一樣充滿心思，毛仔嘅刷頭同頭部都係可動。

「43279 WALL-E and EVE」定價為69.99美元（約HK$550），預計今年8月1日正式發售，如果你係《太空奇兵·威E》嘅Fans，又或者錯過咗上一款威E套裝，不妨考慮入手。