如果大家係恐怖片《The Conjuring》（港譯：詭屋驚凶實錄，台譯：厲陰宅）系列嘅Fans，應該知道電影其實係改編自現實中Ed及Lorraine Warren 夫婦嘅捉鬼經歷，而且二人仲於美國康涅狄格州嘅自家住宅後面經營「Occult Museum」（神秘博物館），收藏及展出包括原版「Annabelle」娃娃等一系列號稱被詛咒嘅物品。而日前著名美國棟篤笑藝人Matt Rife，就宣佈正式購入華倫夫婦嘅住宅以及神秘博物館，未來仲可能會開放旅客入住過夜。

圖片：@Mattrife on IG

卻說神秘博物館原本係由Lorraine Warren以及其女婿Tony Spera一同經營，但2019年Lorraine Warren以92歲高齡過世之後，博物館就交由超自然研究者Dan Rivera管理。而到上月初時，Dan Rivera於攜帶原版Annabelle娃娃出遊時因「自然原因」離世，於是神秘博物館嘅管理權就空咗出黎。

而日前Matt Rife就於IG發文，表示自己於好友、同時亦係捉鬼KOL Elton Castee，聯手買下神秘博物館、館內一切展品，以及華倫夫婦住宅未來五年嘅管理權。而黎緊佢將會開放博物館供旅客入住，屆時大家就可以同Annebelle一齊過夜啦，係咪諗起都興奮呢？

圖片：@Mattrife on IG

而如果你唔知Matt Rife係邊個的話，佢係一位近年火速冒起嘅著名棟篤笑表演者及演員。佢曾於2021年及2023年先後推出三部YouTube限定棟篤笑表演，2023及2024年又推出兩部Netflix限定棟篤笑。而且佢嘅表演片段於社交媒體上非常盛行，其本人嘅IG帳戶亦有超過1,000萬人追蹤，TikTok追蹤人數更係將近2000萬。《Forbes》於6月時公佈嘅網紅及創作者財富榜中，Matt Rife高踞第七，估計去年年收達5,000萬美金。