為慶祝「真・三國無雙」系列25周年，KOEI TECMO近日宣布人氣新作《真・三國無雙 起源》將推出大型DLC，仲有款系列舊作會推出高畫質復刻版！

「真・三國無雙」系列自2000年8月3日推出以來，憑藉爽快嘅戰鬥體驗同三國歷史背景，吸引咗無數玩家。為慶祝系列迎來25周年，最近官方發布紀念短片同開設專屬網站，帶領玩家回顧系列25年嚟嘅歷程，並預告會有一系列企劃活動！其中，今年初推出嘅熱賣作品《真・三國無雙 起源》將推出大型DLC，內容會延續本篇世界觀，講述赤壁之戰以前嘅故事。另外，官方亦確認會將一款系列舊作推出高畫質復刻版（Remastered），不過暫時未有透露係邊一代作品，唔知大家又有冇心水選擇呢？

順帶一提，為慶祝25周年，「真．三國無雙」系列目前在Steam、PlayStation、Xbox及Nintendo Switch等平台舉行特價活動，有興趣嘅機迷不妨把握機會入手重溫經典。