雖然俗語有話「講錢傷感情」，但一段感情要走得更遠更穩定，兩人嘅金錢觀是否合拍真係一大關鍵因素。最近日本人力資源公司Biz Hits就做咗個調查，訪問了505位男女，問佢哋最唔鍾意伴侶有邊項消費習慣，結果顯示花錢在遊戲比賭博更令人反感。

調查一共訪問咗505名受訪者（363女、142男），年齡分布為：10多歲佔0.4%、20多歲23.2％、30多歲41.7％、40多歲23％、50歲以上11.7％。結果顯示，63.7％受訪者認為伴侶嘅消費同儲蓄習慣對感情有重大影響，31.9％人認為有中度影響。而當中最令人反感嘅消費習慣依序分別為：

1.花錢在遊戲上（13.3%）

2.賭博（9.1%）

3.超出自己能力嘅消費（6.7%）

4.花錢追星（5.9%）

5.太堅持AA制（4.8%）

6.送太廉價嘅禮物（4.4%）

7.過分節儉（4%）

至於點解「花錢在遊戲上」會比「賭博」更令人反感，就可能同近年電玩行業變化有關。現時市面上，除咗有買斷制遊戲（畀一次錢就可以玩到尾），仲充斥住大量免費遊玩，但利誘玩家「課金」嘅手遊同大型線上遊戲。呢啲遊戲通常會加入課金抽寶箱嘅機制，玩家們需要花錢先有機會抽到更強嘅道具或靚造型，但往往一擲千金都未必抽到想要嘅東西，呢種模式及帶嚟嘅刺激感某程度上同賭博有幾分相似。不過，對唔熟遊戲嘅人嚟講，實在好難理解點解伴侶會花咁多錢去抽啲「虛擬」嘅東西。相比之下，賭博嘅動機（贏取真金白銀）反而更容易被理解，接唔接受就另計。然而，「花錢在遊戲上」呢個消費習慣並非男性專屬，其中一位30歲嘅男士受訪者就表示：「見到佢喺鍾意嘅手機遊戲一次過課金過萬日元，我真係嚇咗一跳。」

值得一提嘅係，並唔係所有人都希望另一半完全節儉，而排名第5至7嘅反感消費習慣，就係嫌棄另一半太計較同太慳錢，例如食餐生日飯都堅持要AA制、送啲好廉價嘅生日禮物，以及難得放假都唔願意使錢，只係揸車兜下風或行街散步。