DC Studios掌舵人James Gunn日前接受《Rolling Stone》訪問，談到電影產業走向衰落時，佢就直言原因唔係大家唔再鍾意睇電影，亦唔係家庭影院設備愈嚟愈好，而係好多電影未完全劇本就急住開拍。除此之外，佢仲提到Marvel Studios因為過度增產導致作品質素下降。

James Gunn表示自從接手DC Studios後，佢就堅持每部超越英雄電影都要有完整劇本先開拍，仲話DC最近先取消咗一個已經開晒「綠燈」嘅項目，全因為劇本未達標：「大家都好想拍呢部電影，而且一切準備就緒，隨時都開得工，但劇本真係未達標，我冇辦法拍一部劇本唔好嘅電影。」但好消息嘅係，目前DC有幾個劇本令James Gunn非常滿意：「我吔真係幸運，因為《Supergirl》劇本從一開始就超x正，然後《Lanterns》同樣都好x正，《Clayface》亦非常出色。我哋能夠獲得呢啲劇本，一係就非常好彩、一係就好識得揀，又或者兩者皆是。」

除此之外，James Gunn亦提到DC Studios嘅優勢在於無產量壓力，唔似得佢舊東家Marvel Studios。曾經為執導過三部《Guardians of the Galaxy（銀河守護隊）》電影及聖誕特輯嘅James Gunn表示，當年迪士尼為咗推串流平台Disney+，而要求Marvel Studios增加產量，結果作品質素良莠不齊，對整個MCU造成負面影響，就連迪士尼現任CEO Bob Iger都公開承認過呢個錯誤。

反觀DC Studios就冇呢種壓力，James Gunn表示：「喺DC我哋無硬性規定每年要出幾多部電影同劇集，所以我哋覺得作品足夠高質先會推出市場。當然，作品總會有好有壞，但我哋希望整體而言保持高質素。每一個劇本都要我個人滿意先會開拍。」

由James Gunn親自執導及編劇、新DC宇宙首部作品《Superman》將於7月10日正式上映，唔知套戲係咪真係好似James Gunn咁高質呢？