HBO劇集《最後生還者》第二季喺上星期日正式完結，然而收視率卻遠遠不如首季大結局，甚至比第二季首播下降30%。目前HBO已宣布續訂第三季，唔知下季仲可唔可以Keep到人氣呢？

據HBO公布嘅數據，《最後生還者》第二季大結局當晚喺美國吸引近370萬人觀看，呢個成績遠遠不及首季大結局嘅820萬人，亦比第二季首集530萬人跌咗30%。不過，雖然大結局收視未如理想，但第二季整體收視其實係好過第一季，全球每集平均觀看人數約為3,700萬，較第一季嘅每集平均3,200萬人高，而且呢個數字仍持續增長中。另外，或者係因為「喬爾夫球」等爭議劇情，第二季在影評網站Rotten Tomatoes嘅評價亦不如第一季，分別獲得93%影評人評分及38%影迷評分。

目前HBO已確定續訂第三季，劇集主創Craig Mazin日前接受《Collider》專訪時提到，第三季可能會比第二季長，但肯定講唔晒成個故仔，所以佢哋希望能夠贏得足夠嘅掌聲，令團隊能夠拍到第四季完結整個敘事。