John Wick宇宙持續擴張！繼前傳劇集《The Continental》及外傳電影《Ballerina》後，由甄子丹飾演嘅盲人殺手「Caine」亦有望推出外傳電影，並由佢本人親自執導。另一方面，甄子丹亦證實傳咗好多年嘅《Sleeping Dogs》電影版已胎死腹中。

去年甄子丹在《John Wick 4》所飾演嘅盲人殺手「Caine」大受歡迎，獅門影業隨即宣布為其推出一部外傳電影，並預計今年在香港正式開拍。最近甄子丹宣傳新作《誤判》接受外媒《Collider》訪問時就透露，佢唔單只會回歸出演Caine，更有可能會親自執導：「我認為Fans同片商都希望呢件事能夠成真，我唔可以透露更多，但我哋確實密切商討中，大家拭目以待，睇下會有咩事發生吧。但與此同時，我都感受到責任同壓力，我唔想毀咗呢個系列，我會盡我所能，為呢個系列帶一嚟啲新意，唔想令Fans失望。」

除此之外，甄子丹亦透露自己對故事已有初步想法，並期望Chad Stahelski（John Wick系列導演）能提供協助及指導：「我腦海入面有一啲想法，係關於故事應該如何展開，但我唔想透露太多，因為我唔知道自己有冇權去透露。不過佢哋（獅門影業）非常投入，並好高興我參與呢個項目。Chad Stahelski最好就能夠在場啦，我想確保呢個項目非常有趣，我嘅目標係拍出一部唔會令Fans同一般觀眾失望嘅作品。」

另一方面，有「港版GTA」之稱嘅開放世界動作遊戲《Sleeping Dogs》，早喺2017年宣布會改編成真人版電影，並鎖定由甄子丹主演，但一直只聞樓梯響。直到2021年甄子丹宣傳《怒火》時先輕輕提過：「我目前同製片人Neil Moritz、Toby Ascher以及幾個平台傾緊合作，我相信命運，如果能夠成事嘅話，應該會喺2023年上半年開拍。」如今2025年都過咗一個禮拜，事實證明《Sleeping Dogs》嘅命運就係「未開始已經結束」。

對此，甄子丹日前向外媒《Polygon》證實電影已取消製作：「我花咗好多時間，並同一班製片人做咗好多工作，甚至自掏腰包投資咗部份金錢，用於購買劇本及部份版權。我等咗好幾年，我真係好想拍呢部電影，我腦海入面有好多諗法，但好遺憾...你都知荷里活係點運作㗎啦，係咪？」雖然對計劃取消感到遺憾，但甄子丹表示佢已準備好move on到更好嘅事情。