「舞動超速龍球　變做手中狂獸　創造花式　超速穿梭於你我左右」，呢首由方力申主唱嘅《超速搖搖》主題曲，相信每個成長於90年代嘅人都會識唱。事實上當年《超速搖搖》播出時亦的確引起一股「搖搖風」，當時所有小朋友都以擁有一個Bandai出嘅「超速龍球」為傲。而呢個日子好可能即將重臨，因為Bandai近日宣佈會重啟「超速搖搖」系列。

話說於五月時，Bandai旗下嘅「超速搖搖」系列就開設咗X（Twitter）帳戶，並於上個星期五出咗第一個帖文。帖文內容非常簡單，只見一對人手於一個綠色背景中，拎住一個寫有「Accel System」、「Accelorigin」字樣嘅搖搖，隨後「2024.07.01」嘅日期慢慢浮現。而文字方面亦簡短地寫咗「超速搖搖於令和年代重生！7月1日將會披露」。似乎就係代表佢哋將會重啟「超速搖搖」系列。

但你又唔好睇小呢個簡簡單單嘅帖文，發文約24小時後，該帖文就吸引到超過300萬次觀看、近8000次讚好及觀看，而且下面仲有非常多人留言表示要搵返自己個搖搖出黎。

值得一提嘅係，目前未知Bandai係打算重啟「超速搖搖」嘅產品，定係會連帶推出新動畫。而大家熟知嘅《超速搖搖》動畫，最早係於1997年於日本《快樂龍》上連載，動畫版就由1998年播出22集。翻查資料發現當年《超速搖搖》播出嘅同一時段，上一部動畫係《數碼暴龍》、下一部係《爆旋陀螺》，對唔少人黎講應該都係相當難忘嘅童年回憶。