每個男人都有個「機械人大戰」夢，無論係好似高達咁坐喺入面撳掣操控，定係好似《機動武鬥傳G》咁動作操控，甚至好似《鐵人28》咁用搖控器控制，總之係有「機械人」同「打交」我哋就會兩眼發光。而東京鐵塔下新開幕嘅「RFIGHT機械人格鬥」，就能夠完成大家控制機器人打交嘅夢想啦。

位於東京鐵塔下「RED゜TOKYO TOWER」嘅「RFIGHT」，係一個上週先正式開幕嘅遊樂園區，賣點就係玩家可以親自坐入「機械人」入面，用自己嘅動作控制機械人與對方對打。每位玩家都會有自己嘅「HP值」，被打中就會扣血，將對方HP扣到零，或者時間到時HP較高者為勝。而玩家被擊中嘅同時，亦會增加一個特殊攻擊氣槽，儲滿之後就可以使出「10秒間攻擊力兩倍」、「10秒間無敵」、「僅限一擊5倍攻擊力」等「必殺技」。而旁觀者亦可以透過場外嘅平板電腦為玩家「上Buff」，增加攻擊力或加快儲滿特殊攻擊氣槽，可以話係一個既考體力、亦考策略嘅實體對戰。

不過要留意嘅係，雖然名為「機械人格鬥」，但實際上玩家操縱嘅，係一台「外骨骼機甲」。其外形同《異形2》最後，女主角同異形女王決鬥時所駕駛嘅動力服頗為相似，但就冇額外嘅摩打提供動力，所以機械人嘅舉手投足都係靠玩家本人嘅力量。壞處就係同大家想像中嘅「機械人大戰」有些少出入，但好處就係機甲較輕（約15kg），所以對玩家體力要求較低，同時亦較安全。另外機械人嘅拳頭係海綿製成，以減輕衡擊力，亦有透明面板保護玩家嘅頭部。

收費方面，除入場費外每人每玩一次要600Yen（30秒一局，遊玩時間大約兩分鐘）。而且只要7歲以上、身高110cm至200cm，體重不超過120kg、同有著襪就可以玩。如果大家下次去東京旅行，都可以考慮下啦。

資料來源：RFIGHT ロボットファイト