因為日文中「318」同「擻亞人」讀音相近，所以每年嘅3月18日都被視為「撒亞人日」，除咗Fans會發文慶祝之外，官方都會舉行活動慶祝。雖然今年嘅「撒亞人日」幾乎緊接作者鳥山明離世嘅消息，但日本官方依然冇停下腳步，宣佈會送出超像真、人手製嘅比達戰鬥服！

呢件「比達戰鬥服」，其實嚴格上係菲利軍團嘅戰鬥服，比達亦唔係第一個著住呢件戰鬥服出現嘅人，而係悟空嘅哥哥拿迪斯。不過由於比達人氣較高、出場時間又長好多，件衫的確係佢「著紅」嘅，所以大多以「比達戰鬥服」而稱之。

官方於剛過去嘅「撒亞人日」，就於X（Twitter）上宣佈會送出一件全手製、真人可穿嘅戰鬥服。據官網發佈嘅製作過程，可以知道盔甲部份主要係用硬身海棉所製，啡色部份則用人工皮包覆，下身嗰三塊「葉」似乎就係用魔術貼痴上去嘅。而皮手套及藍色底衫同樣亦係由衣匠由紙樣開始縫製。

據官方X發文表示，只要你個X係公開，又有追蹤官方帳號，限期內冇刪文，而且唔係咩暴力團體或罪犯，咁你就可以於3月18日至3月22日晚上23:59之前轉發官方X上嘅帖文參加抽獎，中獎者（名額一名）就有機會得到呢件戰鬥服，並預計於5月上旬發貨。活動目前已經吸引到超過4.5萬人參加。活動詳情亦冇寫明要係日本人，只係話中獎者需要住喺日本，或者有日本嘅收貨地址啫，所以各位香港Fans其實都可以碰下運氣架。

資料來源：dragon-ball-official.com