文青細個嘅時候，係非常不屑電視播啲少女卡通，不屑到你依家叫我講返當年究竟有咩「少女卡通」我都講唔出。之但係一套《美少女戰士》就改變咗我對少女卡通嘅睇法－－集集都有幾條女爆衫喎，唔係唔睇下話！

講笑啫，邊有咁膚淺喎！睇《美少女戰士》就一定係睇佢哋嘅打鬥場面以及不同性格啦！五個《美少女》代表五種唔同性格，你又最鍾意邊個？日本Nicovideo就做咗個訪問，要搵出日本男人最想娶返屋企嘅《美少女》喎！

第4位(並列)：

Sailor Venus(愛野美奈子)(得票率5.7%)

文青認為Sailor Venus係咁多個《美少女戰士》中最靚嗰個，根據劇情，佢亦係四大內大陽系守護戰士(水、火、木、金星)中嘅隊長，戰鬥經驗豐富。日本網友指佢「睇落就係個好老婆」喎，觀乎佢只係得到5.7%票數，我諗就唔係好多人睇得出嘞……

Sailor Mar(火野麗)(得票率5.7%)

傲嬌、黑長直、巫女，集多個男人喜愛嘅特徵於一身，但偏偏得票率低落。我諗同佢嘅火爆性格有關。

第三位：Sailor Jupiter(木野真琴)(得票率8.6%)

第二位：Sailor Mercury(水野亞美) (得票率20.9%)

大幅拋離第三名嘅水野亞美，爸爸係個畫家，媽媽係個醫生，自己係個斯文有禮兼IQ300嘅天才，簡單啲講就即係「白富美」。絕對就係日本傳統「大和撫子」嘅人辦。再加上戰鬥中會拎部電腦出黎指揮作戰，有機會係個宅女，配毒男仲唔係Fit？

第一名：Sailor Moon(月野兔) (得票率23.8%)

明亮嘅領袖，前世係月亮王國公主，未來係新倩尼迪女王，單憑身世黎講絕對係屈機。不過本人對於佢會鍾意一個著住成套西裝再周街掟玫瑰嘅人相當有保留。日本受訪者就認為佢開朗嘅性格大加分，亦都覺得佢喺當中最堅強嘅人！

根據本青嘅觀察，如果你走去問香港女仔鍾意邊個美少女戰士，好多人都會答你Sailor Venus同Sailor Mar，前者貪佢夠靚，後者貪佢夠爽朗，而又好少人會揀水野亞美，而你睇返上面個排名就會發現呢Sailor Venus同Sailor Mars係得票最低嘅美少女，而一個水野亞美嘅得票率就幾乎係佢兩個加埋再加Double。我講咗啲咩，你自己參詳下嘞。

利申，大愛Sailor Venus~~~~~