相信大家都試過因為隻Game好評如潮而入手，但後來先發現原來自己冇時間玩，結果就擺咗喺度封塵。近日有外國網站統計出本年度最多人「買完唔玩」以及「中途棄坑」嘅遊戲，唔知你又收藏咗幾多隻呢？

遊戲數據網站「HowLongToBeat」日前公開2023年「買完唔玩」(Most Backlogged Games)排行榜，冠軍由橫掃多個電玩大獎嘅《柏德之門3（Baldur’s Gate 3）》奪得，緊隨其後嘅分別係《薩爾達傳說 王國之淚》、《霍格華茲的傳承（Hogwarts Legacy）》、《生化危機4重製版（RE4）》以及《Starfield（星空）》等等。雖然網站未有提到具體原因，但都唔難理解嘅，《柏德之門3》《王國之淚》呢類閒閒地需要玩上過百個鐘嘅遊戲，如果唔係有一個長假期都好難有動力打開嚟玩，結果買完返嚟就擺咗喺度封塵。

至於年度「中途棄坑」排行榜，顧名思義就係玩咗一陣就棄Game，原因大多數係遊戲實際內容同期望存在落差，又或者啲BUG多到令人唔想再玩。冠軍由Bethesda嘅《血色降臨（Redfall）》奪得，其次係《Minecraft Legends》、《Forza Motorsport》及《The Last Case of Benedict Fox》等等。