最近有傳Apple即將推出新一代iPad，結果新機就冇喇，但喺尋日就出咗支全新觸控筆Apple Pencil(USB-C)，外觀上同Apple Pencil二代大同小異，最大變化在於筆尾設有滑動保護蓋，用家打開後可以透過USB-C線充電及進行配對。

雖然Apple Pencil(USB-C)同樣可以透過磁力吸附喺iPad側邊，但就唔支援磁吸無線充電，亦不具備壓力感應、點兩下筆身切換工具等高階功能，並且不提供免費鐫刻服務。售價為HK$619，平過現有嘅Apple Pencil二代$999及Apple Pencil一代$779，預計11月初正式發售。