荷里活導演Matthew Vaughn日前出席紐約動漫展(NYCC)，期間除咗公佈即將開拍《Kingsman 3》及《Kick-Ass》重製版之外，仲大爆當年接拍《X-Men 3》卻又中途退出嘅內幕。原來佢當年無意發現20th Century Fox為咗欺騙金像影后Halle Berry回歸出滇「暴風女神」，竟然整咗份假劇本出黎。

Halle Berry於《X-Men 3》中飾演暴風女神 (Storm)

圖片：IMDB

Matthew Vaughn日前於NYCC中提到當年放棄《X-Men 3 》(X3)一事，並說道：「我唔拍《X3》嘅主要原因，而且係真人真事——荷里活可以非常政治性而且奇怪——有日我去咗某個高層嘅辦公室，然後見到份比我印象中厚好多嘅《X3》劇本，我問：『呢份咩黎？』，佢哋答：『哦，你唔使理架。』於是我自己拎黎睇。揭開第一頁見到寫住：『非洲，一班細路因為缺水就黎死，暴風女神 (Halle Berry角色) 召喚暴風雨救咗班細路。』我心諗，呢條橋幾好呀！於是再問：『呢份究竟係咩黎？』佢哋答：『呢份劇本淨係用黎畀Halle Berry睇，因為佢未簽約，而呢份劇本係佢想要嘅嘢。只要佢一簽約，呢份劇本就會掉落垃圾筒。』我心聽完心諗，如果你對個金像影后都可以咁，咁我咪猶如肉碎？所以我唔玩啦…」

《Kick-Ass》(左為Matthew Vaughn)

《X-Men: First Class》(左為Matthew Vaughn)

Matthew Vaughn指自己當時非常「天真」，以為拍戲就係「呢個係預算，呢個係時間表，跟住做」；點知現實係「呢個係預算，呢個係時間表，我哋會扮跟住做，然後亂黎」。佢亦提到當年離開《X3》時，曾有位高層「非常老土地」同佢講過：「你唔使旨意仲有人搵你拍戲！」。但後來Matthew Vaughn執導嘅《Kick-Ass》大受歡迎，於是同一位高層又黎同佢講：「當年我其實唔係咁嘅意思…」仲促成Matthew Vauhgn表拍2011年嘅《X-Men: First Class》，為Fox重啟《X-Men》宇宙。

資料來源：Screenrant