隨住Netflix真人版《ONE PIECE》將於31日正式播出，官方日前公開更多全新劇照，今次主要係海軍陣容，包括路飛爺爺卡普（Garp）、高比（Koby）、卡普得力部下波卡托（Bogard）、摩根上校（Morgan）及其子希路麥普（Helmeppo）。

但最引起網民熱烈討論嘅，莫過於相中嘅超寫實「電話蟲」，猶如真人嘅牙齒，加上凹凸不平嘅紋理令唔少人睇到起晒雞皮！電話蟲係《ONE PIECE》世界中嘅主要通訊工具，外型係一隻蝸牛，而且有唔同造型，當收到來電時更會發出「bulubublu」鈴聲。

Netflix真人版《ONE PIECE》由原作者尾田榮一郎親自監製，第一季共有8集，預計劇情將會聚焦原著漫畫「東海篇」，講述路飛童年時受著名海賊「紅髮」撒古斯啟蒙，自細就立志成為海賊王，長大後便出海追夢，其後相繼邀請「海賊獵人」卓洛、「航海士」娜美、「狙擊手」烏索普以及「廚師」山治入團，朝著偉大航道進發。