無論係邊個年齡段，絕大部份男仔嘅成長過程中總會睇過幾套《高達》動畫，而如果只論動畫最後一集的話，你又覺得邊套《高達》最好睇？近日日本網站「goo」就舉行咗個「最後一集最好睇的《高達》動畫」票選，結果卻頗為出人意表。

完整榜單

圖片：goo

「goo」嘅票選吸引到超過1,600名日本網民投票，其中頭10名大多係相對較新嘅動畫作品，例如2009年播出嘅《RE:0096》(即獨角獸高達)排第九，2000年代初播出嘅《Seed》及《Seed Destiny》就分佔第七及第六，第五名就最新作《水星的魔女》。另外按宇宙世紀年份計最後一部動畫《V》(1993年播出) 就排到第四。

而七、八十年嘅最早期動畫中，《Z》就排名第10，但地位祟高嘅元祖《高達》就只能排第二，都算係跌破唔少人眼鏡。

《機動新世紀 X高達》

《機動戰士 高達》

《機動武鬥傳 G高達》

而要數到大贏家，相信就係一眾八、九十後最熟悉嘅《W》、《X》及《G》三大「平成高達」系列。但令人意外嘅係，深得民心嘅《W》只排第八，反而當年口碑頗差、有傳聞遭提早腰斬、多年黎被評為最低人氣《高達》動畫嘅《X》，就一舉衝到上第三名。有指《X》最後一集廣受歡迎嘅原因，在於以「D.O.M.E」之口提出反戰思想，而且最終戰男女主角都冇穿冇爛，算係大團圓結局。

而整個榜單嘅冠軍，就係《高達》系列中最具特色嘅《G》。想當年見到杜門向莉英告白，再一齊擺出超中二甫士使出「石破LOVELOVE天驚拳」，熱血之餘同時又恥度爆錶，到依家都仲係記憶猶新！難怪會被選為最好睇嘅最後一集。

資料來源：goo