相信大家都知道，目前荷里活編劇們於工會領導下正進行大罷工，導致多部影視作品嘅製作進程都受影響。而本月初罷工開始時，最主要嘅議題其實係編劇們認為串流平台嘅冒起令佢哋收入減少，但近日AI嘅冒起亦同樣成為重要議題之一。簡單黎講，就係編劇們希望業界拒絕AI入侵。

卻說因為近年串流平台嘅製作已佔業界多數，而有別於傳統製作中編劇能獲得分成，無論最終串流平台作品有幾受歡迎，編劇們都唔會獲得額外酬勞，加上串流平台嘅作品集數通常較少，收入自然亦減少，所以早前代表編劇嘅美國編劇工會 (WGA) 就與代表資方嘅影視製片協會 (AMPTP) 進行談判，不過最終談判破裂，編劇們就開始罷工。

但其實除咗提出「重新分配利潤」之外，編劇們都仲有一個訴求，就係希望業界能夠明文禁止使用AI技術，例如ChatGPT等去生成故事大綱又或者具體劇本。據知編劇們擔心未來資方可能會用AI生成故事、劇本，再聘請少量編劇為劇本作潤色，以減低人力及成本，進一步影響編劇生計。同時編劇工會亦提出，禁止任何屬於工會旗下嘅劇本、內容用於訓練AI之上。

但與利潤問題一樣，荷里活資方同樣否決咗編劇工會提出嘅建議，只表示會每年同工會進行會議，相討「新科技嘅改變」。對此，紐約Cornell大學就業關係教授Virginia Doellgast就表示，資方提出嘅承諾其實相當脆弱，擺明就係唔想為AI嘅使用方法加上限制。而即使有個「年度會議」，編劇們其實都冇任何力量去阻止資方使用AI技術。而MIT企業系教授 Simon Johnson就表示，如果編劇們能夠從談判中 (某程度上) 支配業界如何使用AI，咁佢哋或者可以從中獲利，但萬一係資方掌握AI使用權，咁編劇們可能會有巨大損失。

資料來源：New Scientist