自從Elon Musk收購Twitter之後，一時又話藍剔認證要收錢、一時又話就黎破產，更有亂封用戶、假冒帳戶獲得藍剔等一系列亂象。而其中一位「受害者」，就係《鏈鋸人》作者藤本樹 (藤本タツキ)，事關佢個有近40萬Followers嘅「九歲妹妹」帳戶，竟然被Twitter成個刪除咗，搞到佢要另開一個之餘，仲瘋狂提出搞笑「證詞」證明自己就係藤本樹。

圖片：藤本タツキ@ashitaka_eva

有睇過下《鏈鋸人》或者《炎拳》嘅話，大家應該知道藤本樹個腦真係唔知裝咩(褒義)，而現實生活中嘅佢，行為亦令人相當費解，結果就導致佢被Twitter刪除帳戶。卻說藤本樹早年開咗個Twitter帳戶，但就唔係用「藤本樹」呢個名，而係叫做「長山小春 (nagayama_koharu)」，而且設定上係「藤本樹個讀緊小學三年班嘅九歲妹妹」，平時發文亦刻意模仿小妹妹嘅語氣——提提你，藤本樹本人其實係個30歲嘅大男人。本來大家都覺得佢呢個設定幾好玩，但由於近來Twitter「嚴格」執行使用條款，限制未滿13歲嘅人使用Twitter，結果「長山小春」呢個帳戶就因為「年紀太細」而被封號。

圖片：林士平（りんしへい）@SHIHEILIN

「長山小春」被封號後，《鏈鋸人》編輯林士平就於自己嘅Twitter發文向讀者解釋情況，與此同時，Twitter上又出現一個叫「藤本タツキ」，但冇頭像、英文名亦同藤本樹完住冇關嘅新帳號，該帳號高呼「我真係藤本樹！大家請相信我！」然後為咗證明自己而不斷提出「證據」，當中包括「今年最喜歡的漫畫是《おかえりアリス》！」、「我最鍾意嘅吉卜力動畫係《千與千尋》同《魔法公主》！」、「我兩隻手都被狗咬過！」、「我係天秤座」，甚至公開埋《鏈鋸人》嘅情報圖，最後又係編輯林士平出黎幫手證實呢個新帳戶係藤本樹本人。而藤本樹亦在新帳戶表示，目前仍努力拎返「長山小春」個帳戶，依家呢個臨時用住先，未來主要會討論《鏈鋸人》動畫版。