曾經聽過一個女仔講，佢之所以唔鍾意打機嘅男仔，唔係因為佢覺得打機好幼稚，而係佢覺得啲人打機成日都打到好暴燥，佢覺得好得人驚。作為一個Gamer，相信各位都無可避免地，曾經打機打到燥，但你又有冇諗過，各大主機陣營中，邊部主機嘅玩家係最易燥？邊隻Game又係燥底大作？

美國網站「Time2play」日前就公報咗個調查，佢哋以問卷方式詢問咗超過1,000名，每星期至少打4個鐘機 (平均14.9個鐘) 嘅美國玩家，紀錄佢哋用邊部主機，有幾易打機打到嬲，嬲嗰陣又有咩行為。

結果就發現，有42.1%Switch嘅玩家指，自己「甚少」會打機打到燥，乃係眾陣營中最高；Xbox及PS兩大主機陣營嘅「甚少發嬲」人數比例僅有36.7%及37.1%墊底。但你又唔好以為玩開兩大主機嘅人就特別燥，因為有42.8% Switch玩家以及43.1%手遊玩家，表示自己一星期會有一次打到燥，比起Xbox玩家 (38.7%) 都仲要高，不過就追唔上PS陣營 (46.7%)。

而到最惡劣嘅「日日都打到燥」情況又唔同，手遊 (7.9%)、Switch (10.5%)、電腦 (14.1%) 以至 PS (12.4%) 嘅比例都大致相近，唯獨Xbox玩家有21.3%一支獨秀。

Xbox玩家同時係「發嬲時最易打爛嘢」嘅組別，有23.2%Xbox玩家表示曾經因為打機太嬲而打爛嘢，PS陣營以21.6%緊隨其後，最低嘅就係Switch玩家，只有14.8%。而喺眾多被打爛嘅嘢之中，通常都係首當其衝嘅「手掣/鍵盤滑鼠」佔咗73.2%，牆身都有15.8%。

而講到「最易令你嬲」嘅遊戲，《Call of Duty》系列以23.5%居首，可以話係意料之中；反而感覺係「休閒遊戲」嘅《Mario Kart》(22%) 及《Minecraft》 (21.2%)分列二、三位，比起《League of Legends》都仲要高就令人驚訝。

資料來源：Time2play