由Christopher Nolan執導嘅「黑夜之神三部曲」（The Dark Knight Trilogy）絕對係英雄電影嘅經典，喺影迷心中有住不可撼動嘅地位。最近忙於宣傳新作《雷神奇俠4》嘅Christian Bale就表示，如果Nolan打算再拍落去，佢都願意重披戰袍再演蝙蝠俠。

日前Christian Bale於《雷神奇俠4》新聞發布會接受外媒《ScreenRant》訪問，被問到是否願意回歸再演蝙蝠俠時，佢就表示到目前為止都冇人搵過佢討論再演蝙蝠俠，仲話如果要回歸，導演就必須要係Christopher Nolan：「我同Nolan曾經約定過，如果《Batman》有機會拍成三部電影嘅話，就會徹底告別呢個系列，唔想搞到太長。之不過，如果Nolan仲有故事想講，而佢又願意同我分享嘅話，我都樂意回歸。」

雖然Christian Bale願意回歸，但考慮到Christopher Nolan老早就冇參與DC電影製作，而且又因為「戲院/串流平台同步上映政策」疑似同華納兄弟鬧翻，所以成事機會應該微乎其微。