由於疫情影響而多次延期嘅《Mission：Impossible 7（職業特工隊：死亡清算上集）》終於公開首條預告，年近60歲嘅Tom Cruise繼續親身上陣挑戰更多「不可能」，上演街頭飛車、火車頂肉搏、沙漠騎馬槍戰、懸崖跳傘等驚險戲碼！預計明年7月正式上映。

短短2分鐘嘅預告片入面，可以見到Tom Cruise上演各種驚險刺激動作戲，當中最精彩莫過於揸住電單車飛出懸崖跳傘！據外媒報導，靚佬湯為咗呢一幕花咗成年時間準備，包括跳傘500次及電單車飛車13,000次，敬業精神令人真心佩服。除咗連場動作戲，大家亦可以欣賞到杜拜、威尼斯、羅馬、英國嘅靚景。

《Mission：Impossible 7》依舊由第5及第6集導演Christopher McQuarri編導，除咗靚佬湯之外，Rebecca Ferguson、Ving Rhames、Vanessa Kirby、Simon Pegg等人亦全數回歸，值得一提嘅係，曾出演1996年《Mission：Impossible》第一集嘅Henry Czerny亦會回歸演出。電影預計明年7月14日正式上映，而系列最終章《Mission：Impossible 8（職業特工隊：死亡清算下集）》就暫定2024年，希望唔會再延期啦。