Johnny Depp (JD) 控告 Amber Heard (AH) 誹謗案進入第17日審訊，庭上繼續由AH本人作供，並由JD代表律師Camille Vasquez進行盤問。而Vasquez律師繼續對AH供詞中的疑點及與其他證人供詞之間的矛盾窮追猛打，不但令AH多次聲稱其他證人嘅供詞有誤，更提出AH可能作偽證嘅可能性。不過要數最令人印象深刻嘅，就係Vasquez律師於庭上播放一段AH不停叫JD「Suck My Dick」，隨後鬼上身式狂笑的錄音。

昨日審訊一開始，Vasquez律師先展示AH於2012年送畀JD、刀身寫上西班牙文"until death"嘅一把匕首，並質疑AH聲稱2011就已經被JD家暴，但就向「家暴者」送上武器。而AH就堅持家暴由2011年已經開始，但中間有「暫停 (a break)」，而佢就喺於「暫停」時送刀畀JD。隨後Vasquez律師又展示JD與AH嘅「愛情日記」，並顯示當中AH寫道：「愛情不只是瘋狂的熱情或和平的安全，是兩者皆有……但我當然想把你撕成碎片、吞噬你並好好品嘗味道」，而日記中AH最後一篇文章中，就多次向JD道歉，「抱歉我有時會變得瘋狂，抱歉我傷害了你」。

隨後Vaquez律師再展示一段錄音，當中係AH與JD因為某件事而爭吵，JD說道：「明明所有事都好順利，直到事情不如你所願，然後我就有麻煩…我唔想要你，唔想你返黎…」而背景中AH就一直低聲重覆「Suck My Dick」；同一段錄音的稍後時間，就聽到爭吵逐漸升級，AH激動地、不停爆粗地辱罵JD，隨後更開始失控狂笑，嘲諷JD「又要逃跑去你第十五間屋啦」，「你可以似返個真正的已婚男人，似個男人一樣處理你啲事嗎？ (Deal with your shit)」更於錄音中稱JD為「背叛者 (Sell-out)」、「笑話 (Joke)」及「玩完嘅糞便 (Washed-up piece of shit)」。

隨後庭上又展示一系列AH傳畀JD嘅訊息，AH於訊息中多次軟硬兼施地要求JD與其聯絡或回家，當中更威脅到「唔好逼我成為另一樣嘢，你依家係當我奉旨，而我唔能夠停下來。直至事情變得比依家黑暗好多」，而JD全程都冇回答過，似乎係逃避緊AH。AH接受盤問時試圖解釋，佢不停哀求JD與其聯絡，係「想阻止JD進入下一個濫藥/酗酒再襲擊的週期」。

另外Vasquez律師亦展示兩張AH方呈交，據指係展示AH被JD家暴後面部傷勢嘅照片，從中可見兩張相不論拍攝角度、AH嘅姿勢、甚至飄起嘅頭髮都一模一樣。Vasquez質問AH是否有「執相」去試圖令相中自己塊面更紅，而Amber Heard就否認自己「有執過任何相」，堅稱兩張相嘅分別在於有開燈同冇開燈。值得一提嘅係，Amber Heard昨日曾指，JD於二人渡蜜月期間於火車車廂內襲擊佢，但隨後Vasquez律師出示二人渡蜜月時與火車工作人員拍攝嘅一張合照，從中可見反而係JD面上疑似有瘀傷，而AH就否認，聲稱張相被人執過。

全場AH亦多次使出「唔記得」策略，不但「很方便地」唔記得當年某些事情嘅關鍵，亦「唔記得」是次審訊中其他證人稍早前嘅供詞，甚至多次指出對方供詞錯誤。例如早前有兩名警員作供表示接到報案到場後，冇見過AH面上有傷痕，AH就指兩名警員係「唔認為我臉上嘅係傷痕」。