Nicolas Cage曾經係荷里活一線男星，但近十年就成為爛片之王，唔單止幾乎部部都爛，而且產量奇高 (十二、三年內拍咗46部戲，同期Brad Pitt拍咗19部、Tom Hanks 11部、Leonardo DiCaprio 9部)，唔少人就將佢濫拍嘅原因歸咎於佢欠下一大堆債務，需要搵錢填數。事實上，佢又的確係曾經欠美國國稅局1,400萬美金，仲有其他私人借貸，但日前佢接受《GQ》訪問時就話：「我已經還哂錢！」

圖片：GQ

Nicolas Cage嘅財務困境起源於佢大規模、幾乎無節制地投資房地產，再加上2008年金融海嘯、以及佢本人大手大腳嘅花費，結果花盡積蓄兼欠下巨債，同時佢演藝事業又遇上瓶頸，票房不濟片酬下降佢就唯有去接拍低成本電影，再加上佢爸爸離世、媽媽有精神問題，本人酗酒、混亂嘅個人生活，種種因素下「造就」佢成為爛片之王。Nicolas Cage接受訪問時提到當時嘅情況：「出面有一大班債務人同國稅局追緊我，而我每個月仲要用20萬美金去照顧我阿媽，以防佢要進入精神病院，我真係搞唔掂，所有嘢都一齊黎。」

圖片：GQ

即使身邊好多人都叫佢申請破產，佢都依然拒絕，唯有不停接戲。但佢強調：「就算係我一年拍緊四部戲，一部接一部再接一部嘅時候，我依然都會喺嗰啲戲到搵啲可以全力以赴嘅地方。嗰啲戲係唔掂，全部都唔掂——當然有啲係非常好，例如《Mandy》——但其他有啲真係唔掂，但我冇Hea過！所以大家係誤會我唔Care自己拍啲咩，我Care架！」

Nicolas Cage亦宣佈佢於年半前就已經還清所有債務，有趣嘅係，最後令佢還清條數嘅嗰部戲，就係佢飾演自己、諷刺自己，黎緊會上映嘅《The Unbearable Weight of Massive Talent》。

《National Treasure》海報

圖片：IMDB

另外，Nicolas Cage於訪問時亦特別提到深受觀眾喜愛嘅《National Treasure (港譯：驚天奪寶)》系列。佢先係提到當年自己事業停滯時：「冇人打黎搵我拍戲，點解我哋唔拍《National Treasure 3》嘅？14年啦喎？Well，就係因為《Sorcerer's Apprentice》唔掂、《Ghost Rider》賣唔到飛，《Drive Angry》引唔起話題。」

然後佢就話，依家自己享受拍《Pig》以及《Leaving Las Vegas》呢啲獨立電影，多過去拍《National Treasure》呢啲大製作，哪拍系列監製Jerry Bruckheimer近來有放風話想拍第三集，佢都唔認為會成事，「當我講嗰啲跟紅頂白嘅朋友時，我唔係講緊Jerry，我係講緊Disney。佢哋就好似啲遠洋大貨輪咁，當佢決定咗某個方向，就要有一百萬隻拖船先可以帶佢返黎。」

資料來源：GQ