憑執導《Creed（洛奇外傳）》《Black Panther（黑豹）》而為人熟悉嘅美國導演Ryan Coogler，早前到銀行提款被職員誤認為劫匪，結果被警方鎖上手扣帶走，後來發現係誤會一場就立即釋放。

據外媒《TMZ》獨家報導，今年1月Ryan Coogler喺亞特蘭大一間美國銀行（Bank of America）提款，由於佢當時戴晒帽、太陽眼鏡及口罩，並將一張寫上「我想從支票戶口提取12,000美元現金。請在其他地方點鈔，我想保持謹慎低調。」嘅字條遞向櫃位職員，結果被該名黑人孕婦職員誤認為劫匪，隨即報警求助。

當警方抵達現場後，發現門外停泊住一部SUV，而且車上有兩名疑似負責接應嘅「同黨」，於是將車上兩人連同Ryan Coogler一齊鎖上手扣帶走，直到後來發現誤會一場就將3人釋放，但Ryan Coogler就唔係咁高興，拎咗當日每位警員編號以作投訴。