要數Eddie Redmayne嘅代表，為佢奪得首座奧斯卡最佳男主角嘅2014年電影《The Theory of Everything》絕對係首選，而2015年為佢再奪奧斯卡提名嘅《Danish Girl》大概就排第二。不過Eddie Redmayne近日接受訪問時，就話接拍《Danish Girl》係一個錯誤，仲話依家畀佢揀多次，佢唔會拍。

圖片：《Danish Girl》on IMDB

《Danish Girl》以有紀錄以來最早接受「性別重置手術」嘅丹麥藝術家Einar Mogens Wegener / Lili Elbe為主角，講述他因為協助妻子繪畫而穿上女裝，從而愛上女性身份嘅故事。電影評價雖非極高，但Eddie Redmayne嘅演技就備受認同，亦為佢帶來一次奧斯卡最佳男主角提名。但即便如此，電影上映後卻一直有批評指，不應由Eddie Redmayne、一位男性演員去「扮演」一位跨性別者，而係應該搵一位同樣係跨性別嘅演員去做。

圖片：《Danish Girl》on IMDB

而近日Eddie Redmayne接受英國《The Time》訪問時，就直言接拍《Danish Girl》係一個錯誤，仲話如果依家畀佢揀多次佢唔會拍：「依家我就唔會接啦。雖然我當初係想件事好先去拍，但睇黎係一個錯誤。」

但你又唔好以為Eddie Redmayne係唔支持跨性別角色——畢竟早前J.K. Rowling被指恐同時，呢位《怪獸與牠們的產地》男主角乃係第一批跳出黎批評嘅人之一——而係因為佢都認同Lili Elbe一角應該由跨性別演員黎做：「我覺得圍繞選角問題嘅更大討論，係好多人根本冇辦法去參與選角嘅討論。所以一定要搵方法平衡一下，唔係我哋就會不停有呢啲爭論。」

資料來源：The Time